Page navigation
ប្រភព និងកាលបរិច្ឆេទរបាំក្បាច់បុរាណ ឬព្រះរាជទ្រព្យខ្មែរ
របាំក្បាច់បុរាណ ឬរបាំព្រះរាជទ្រព្យខ្មែរ ដែលបានផ្ដល់កំណើតទៅឲ្យរបាំថៃ និងលាវសព្វថ្ងៃនេះ មានប្រភព
ចេញពីឥណ្ឌា ដោយហេតុថា ទម្រង់សិល្បៈនេះតម្រូវតាមពិធីសាសនាព្រហ្មណ៍ ដែលផ្សាភ្ជាប់នឹងរបបរាជានិយម ហើយ
បានធ្វើដំណើរឆ្លងកាត់ដំណាក់កាលនៃប្រវត្ដិសាស្ដ្រជាច្រើន មុននឹងឈានចូលមកសម័យទំនើបយើងនេះ ។
អាស្រ័យហេតុនេះ យើងអាចនិយាយបានថារបាំនេះ ដែលមានដើមកំណើតចេញពីសាសនាឥណ្ឌា ហើយមាន
លក្ខណៈពិសិដ្ឋថែមទៀតផងនោះ គឺជាដង្វាយដ៏ថ្លៃថ្លាមួយឧទ្ទិសដល់ព្រះអាទិទេព ។ កុំភ្លេចថា គេរាំថ្វាយវត្ថុស័ក្ដិសិទ្ធិ ឬ
ទេវតាដែលបីបាច់ថែរក្សាលោកយើងនេះ ដូចជាក្នុងពិធីបួងសួងសុំទឹកភ្លៀងសម្រាប់ស្រែចំការ ឬដើម្បីសុំសេចក្ដីសុខ
សេចក្ដីសប្បាយជាដើម ។
ប៉ុន្ដែមកដល់ឥឡូវនេះ ដោយមូលហេតុសង្គ្រាម ក្បួនខ្នាតគម្ពីរពាក់ព័ន្ធទៅនឹងប្រវត្តិដើមនៃរបាំនេះ ត្រូវបានបាត់បង់
អស់ទៅហើយ ទោះបីនៅស្ទើរតែគ្រប់ប្រាសាទ ដែលជាទេវស្ថានមានការបន្សល់ទុកនូវចម្លាក់អ្នករបាំយ៉ាងកុះកុញក្ដី ។
យោងលើរបកគំហើញបុរាណវិទ្យា ដែលគេបានរកឃើញនៅម្ដុំអូរកែវ(កម្ពុជាក្រោម) និងនៅអង្គរបុរី នៅខេត្តតាកែវ
ដោយឡែកនៅក្នុងបរិវេណក្បែរវត្តគំនូរបច្ចុប្បន្ន ដែលជាទីតាំងរបស់រាជធានីចាស់នៃនគរភ្នំ ពីសតវត្សរ៍ទី១ ដល់ទី៧ យើង
អាចកត់សម្គាល់ថា របាំនេះបានចាប់ពន្លកក្រោមព្រឹត្តិការណ៍ឥណ្ឌូភាវូបនីយកម្ម នៅលើទឹកដីកម្ពុជាយើង តាំងពី
បុរាណកាលម្ល៉េះ ។
ដូច្នោះ ជាការពិតណាស់ដែលរូបភាពចម្លាក់ដីដុតតំណាងឲ្យស្រីរបាំម្នាក់ដែល ភ្ជាប់មកនេះ ពិតជាសក្ខីកម្មជាក់ស្ដែង
បង្ហាញថា នាគ្រាដំបូងនៃប្រវត្តិសាស្ត្រ ក្បាច់របាំខ្មែរ ត្រូវបានចម្លងតាមបែបផែនការនៃរបាំឥណ្ឌាយ៉ាងប្រាកដ ។ រីឯចំណុច
មួយដ៏សំខាន់ទៀត ហើយវាក៏ជាភស្ដុតាងសំខាន់មួយដែរ គឺវត្តមានចម្លាក់មួយចំនួនទៀតធ្វើអំពីដីដុត ឬឆ្លាក់លើសន្លឹក
មាស ពិតជាមានទំនាក់ទំនងនឹងរឿងរាមាយណៈឥណ្ឌា ដែលមានរូបហនុមាន និងសូគ្រិព ជាតួអង្គ ។
សរុបសេចក្ដីមក ដោយសារតែតឹកតាងខាងបុរាណវិទ្យាខាងលើនេះហើយ ទើបយើងហ៊ានសន្និដ្ឋានថា របាំក្បាច់បុរាណ
សព្វថ្ងៃគឺជារបាំទេវៈ : មានប្រភពចេញពីប្រទេសឥណ្ឌាបុរាណ ហើយអ្នករាំទាំងនោះ ដែលជាស្រីទេពអប្សរានោះពិតជា
នៅឯឋានសួគ៌ាមែន បើយោងលើជំនឿដែលមានក្នុងទេវកថាបែបព្រហ្មញ្ញសាសនា ៕ (ម.ត្រាណេ)
ប្រភព និងកាលបរិច្ឆេទរបាំក្បាច់បុរាណ ឬព្រះរាជទ្រព្យខ្មែរ
Last updated 726 days ago by vatana.KHOEURN
/5 stars ( votes)